Tveir af eigendum gistiheimilisins, þau Sturla og Kristín, hafa rekið matvöruverslun í sama húsi síðan 1988 og byggingavöruverslun síðan 1996.  Húsið var upphaflega byggt og teiknað með því hugafari að reka í því gistiheimili eða hótel.  Það var þó ekki fyrr en síðla sumars 2009 sem ákvörðun var tekin um að hefja framkvæmdir.

Veturinn 2009-2010 hófust því framkvæmdir á byggingu gistiheimilisins, sem hafði verið fjarlægur draumur þeirra hjóna í 21 ár.  Rýmið sem notað var fyrir reksturinn hafði staðið auður í öll þessi ár og því tilvalið að nýta það undir þessa atvinnugrein sem virðist vera ört vaxandi hér á landi.

Ákveðið var strax í upphafi að allur aðbúnaður yrði sem bestur.  Herbergin voru öll höfð rúmgóð og með sér baðherbergi.  Rúm, sængur og rúmfatnaður voru valin af kostgæfni og góðir skápar hafðir í öllum gistirýmum.  Morgunverðar-/veitingasalurinn var hannaður með því tilliti að hann nýttist einnig til fundarhalda og ráðstefna.  Þar var komið fyrir breiðtjaldi, góðu hljómflutningskerfi og leðurstólum sem fara vel með bæði gesti og fatnað þeirra.  Salurinn nær utan um a.m.k. 50 gesti í sæti.

Gistiheimilið var svo loks opnað í júní 2010.  Til þess að auka þjónustuna enn frekar standa nú yfir framkvæmdir á eldhúsi sem ætti að geta sinnt matseld fyrir 50 manns.

Gistiheimilið er rekið af þeim hjónum Kristínu og Sturlu, ásamt dóttur þeirra, Erlu Lind og Sigursteini eiginmanni hennar.